ଆହେ ନିରମଳ ସୁନ୍ଦର ଉଜ୍ଜ୍ୱଳ ମନ ମନ୍ଦିରରେ ରାଜ ହେ,
ଦରଶନ ଲାଗି ରହିଛି ମୁଁ ଜାଗି
( ଆଜି) ଦେଖାଦିଅ ହୃଦରାଜ ହେ । ଘୋଷା ।
ତୁମ ଲାଗି ପ୍ରଭୁ ଛାଡ଼ିଛି ମୁଁ ସବୁ
ନିନ୍ଦା ଅପମାନ ଲାଜ ହେ,
ତୁମ୍ଭ ଦେଖା ପାଇଁ ବସିଛି ଅନାଇ
(ପ୍ରଭୁ) ବଡ଼ ଆଶା କରି ଆଜ ହେ । ୧ ।
ତୁମ୍ଭ ଆବାହନେ ବିଶ୍ୱ ନିମଗନ ମୋ ପ୍ରାଣ-ବୀଣାରେ ବାଜ ହେ,
ତୁମ୍ଭ ପାଦ ତଳେ ଫୁଲ ଫଳ ଦୋଳେ
(ଆଜି) ପ୍ରୀତି-ଫୁଲେ ହୃଦ ସାଜ ହେ । ୨ ।
ମରମ କୁଟୀରେ ପରବେଶ ଥରେ,
ଚିରଦିନ ତଥା ରାଜ ହେ,
ମଳିନ ମରମ ଯଦି ଦେଖ ମମ
(ପ୍ରଭୁ) ତବ ପୁଣ୍ୟ ଜଳେ ମାଜ ହେ । ୩ ।
Leave a Reply